الزواج

الزواج نعمة بس بالكويت يصير ساعات نقمة بتقولون ليش ، أنا أقولكم أنته ألحين تبي تتزوج خلاص قررت يا تروح حق أمك وتقولها خطبيلي أو انك تشوفلك وحده معاك بالدراسة بالدوام جيرانكم المهم من برّه ، تعال شوف الطلبات ، مو كلهم جذي البعض ، أنا أتكلم عن الناس اللي يعقدون الزواج ويكرهون الشباب فيه ، والله أنا مهر بنتي بثمانية ابن اللذين بتزوج ولا بشتري سيارة حتى لو بشتري سيارة ما أدفع ثمانية دفعة أولى ، عاد اللي يسمع المهر يقول هالبنت ماكو أسكت أخلاق وعلم ودلال وأهي أعوذ بالله من الشيطان الرجيم ، لسانها يلوط أذانها ، أتخلص من الأبو دش على الأم لو تبني قسيمة ما يطلع عليك الحساب جذيه ، مو كلهم البعض فيه ناس يقولولك أول ما تخطب احنا نشتري الريال هذيل أرقد وآمن هذيل معاهم صج يصير الزواج نعمة ، أتييك الأم أبي عرس بنتي بفندق خمس نجوم وأبيك تسفرها جنيف والله لو تقولها وين جنيف تقولك بالمغرب ، بس أنا سؤالي ليش يا ناس يا بشر ليش تعقدون الزواج جذيه خلوا الشباب يتزوج مبجر بدال لا يسافر مني ومناك ويخربط والسبّه أنه مو قادر يتزوج خلوا الشباب يستقر، وبس مشكورين

يبيلنا هيئة أمر بالمعروف

هيئة الأمر بالمعروف والنهي عن المنكر ، ليش ما يكون عندنا وحده بالكويت ؟؟ بس ما نبي نفس اللي عند بعض الناس ، نبي وحده نحطها بالسالمة حق هذيل البشر اللي طالعين لنا طلعه كل واحد شايل جيتار على ظهره واللي لابس سلسله واللي لابس سوار ومادري شنو ، وتعال شوف الذوق باللبس أحمر بأخضر بأزرق بأصفر يعني مشاالله أرقوز ، مو ناقصه إلا أنه يكوكس بمرينا ويطلع نار من حلجه ، وتعال شوف القصات والله ما تعرف الريال من المره ، بو الشباب يطول شعره ويا ريت شعره ناعم ، والمره تقص قصات رياييل ، تبي ترقم وحده تخاف لا يطلع صبي ، بذمتكم هالأشكال ما يبيلهم ناس جذي محترمين لابسين دشاديش زقرت وكل واحد بيده خيزرانه وتلسّب فيهم بمرينا وهاللي شايلين جيتار يكسرون الجيتار فوق روسهم ، أدري بتقولون حرية شخصية وأنا شحارني اللي حارني أنه لما تسافر دول الخليج الثانية أسمع الحجي اللي يقولونه عن شباب الكويت رياييل وحريم وأخذ منهم طنازه ، يعني والله بالذمة اشفيها لا لبست شي مثل الأوادم شي متناسق محترم مو شرط دشداشه ، أدري مو كل الشباب جذي أنا أتكلم عن البعض ، في شباب الصراحه رافعين أسم الكويت برّه ، بس هاللي فاضحينا بكل مكان وهالبنات ، بس شقول شخلّي ، الله يهديهم ويهدينا وياهم ، ومشكورين .

المدرّسين

المدرسين بالكويت من أحسن المدرسين بالعالم وخاصة مدرسينا بالثنوية أييك المدرس معطيه فول من صباح الله خير وياي المدرسة مولع ، مخه منتهية صلاحيته من أكل الفول ويبي يدرّس بعد ، والله مشكلة هالمدرسين مو كلهم بعضهم ، لا تعال وشوف الذوق عاد أنا اللي أعرفه أنه الانسان كل ما زاد علمه زاد وياه أشياء وايد مثل الذوق باللبس يصير أحسن ، يهتم بروحه ومظهره أكثر ، هالمدرسين غير .. طول السنة نشوفهم على بدلة وحدة أول السنة لونها أزرق فاتح وآخر السنه يصير لونها بنّي من كثر ما يغسلها طبعاً ، وتعال شم الريحه ، لو تمر ذبانة يمه تختنق وتموت ، أصلاً تتحسف الذبانه أنها مرت يمّه ، وكلهم تلقى الكرش طالع تقول حامل ، ولا اييك مدرس مصري يدرسك انجليزي لو ما تدرس أبرك يخليك تتحسفعلى اليوم اللي دشيت فيه مدرسة ، زس إز أكار ، أند زس إس أبنسل ، ويقعد عاد يشتغل زس إز و زس إز ، هذا قول ميخالف أمره يهون ، لا اييك مدرس يقرق فوق راسك ، أوووو شيفكك ، يقعد طول الحصة ما يتنفس بس يتكلم ، وجمال عبد الناصر والسادات وألعن أبو اسرائيل ، يا استاذ الدرس يقولك أنا آسف رحت بعيد شوية ، ويقعد يشرح اشوي ويرد مرة ثانية على اسرائل وما خفي أعظم ، هالمدرسين مشكلة الصراحة لازم يشوفون لهم حل يا يذبحونهم ويفكونّا من شرهم يا يشوفنلهم صرفة ... ومشكورين .

الأحلام أبّلاش

تخيلوا يا جماعة الخير لو أنه أي واحد منا يقعد من النوم بيوم من الأيام فجأة ولا بو الشباب صاير رئيس دولة طبعاً إذا الأخ مو شايف خير أول شي بيسويه بيشتري كامري ، هذا اذا اهو مو شايف خير ، أما اللي شايف خير تلقاه يهتمله بشغله ويقعد يطورها ويعدل فيها ، أنا مثلاً لو أمسك دولة ( بالمشمش أكيد ) أول شي راح أسويه أخلي دوري الكرة نار ، أخليه أحسن من دوري أبطال أوروبا ، وثاني شي أهتم بالجيش ، عشان اللي فيه خير خله يتحرش ، , والاقتصاد مهم بعد لازم أهتم فيه بعد ، طبعاً ما أحضر ولا اجتماع حق جامعة الدول العربية لأن ما وراهم إلا الفقر وعوار الراس ، وماني صاير نفس بعض رؤساء هالدول اللي الرئيس يمشي وراكضين وراه مليون واحد يعني حرس وأهمه طل وآخر شي ولا رامين الرئيس ولا مفجرين سيارته ، أبي أمشي بروحي بسيارتي الخاصة ، بس أهم شي أهم شي أخلي الناس تسولف على راحتها تقول اللي تقوله ، أبي أسمع رايهم بكل شي أخلي الديموقراطية بكل مكان وأنشر العلم والثقافة وأطور المناهج بالمدارس ، أخلي تعليم الكمبيوتر يبدي من الروضة ، وأزيد عدد اللغات اللي الناس تدرسها بالمدارس مو بس عربي وانجليزي ، أحط ألماني وياباني وصيني ( أنا اللي بدرس الشعب اللي راح يدرس ) وأشيل سالفة الكتب ، كتب مابي أبي كل طالب يروح مدرسته معاه لابتوب بدال الجنطة وأبي أحط وايرلس بكل مكان بالمدرسة بالشارع حتى بسوق اليمعه ، وأبي أبني مدينة تحت الماي لا لا رحت بعيد ، بس هذا إذا صرت رئيس دولة بس ليش لأ يمكن أصير ( مصدق نفسي ) أنا واحد متفائل وأحب التفاؤل محد يدري شيصير وبس مشكورين